KITNDA

尋日下晝去左深水步，係一間做緊清貨大減價既玩具舖頭入面，人多路窄，我見一對男女迎面而來，我就企埋一邊等佢地過，小的女友因為行得快 d ，所以已經走左過去，男的為保護女的，就從後抱著女的，手肘向外，小的女友走過去時已經俾佢撞到，點知連企埋一邊既我都佢個用肘撞開，仲搞到我差 d 企唔穩，撞跌人地 d 貨，俾人撞當然有 d 唔順氣啦，咁我搵返女友就講「 d 仆街想人借過都唔識講唔該借借既，淨係識係度撞撞撞」。

去到第二間舖，見迎面而黎既又係果對男女，為免又俾佢撞，咁我同女友就行第二邊啦，咁我轉身後就同女友講「又見到仆街啦」，講完行多兩步就俾人係後面大力咁推左下，仲差 d 撞向貨架，咁我企定就回頭望望啦，見到個男的同我講「你講乜燃野呀？你邊度架？有野出門口講？」，佢講完我望多兩望就講聲「咩呀？」後就走開，廢事同佢嘈。

我一直都無指住佢話佢仆街，估唔到佢竟然自己 get 到自己係仆街，厲害！

雖然我明白應該係我先撩者賤，但俾人撞到差 d 跌低，俾著係你都會有幾句怨言啦！

btw ，香港無品仔的確唔少，成日都見到 d 想人借過但又唔出聲只識撞開人既人，撞完人仲要出聲屌既人 lor 。