KITNDA

星期六為慶祝搬出黎住一周年，諗住食貴少少，逛沙田期間去左博多拉麵度食，我發誓，就算貼錢請我食，我都唔多再去食…家下亦好後悔，唔睇食評就去食，就咁浪費左百幾蚊 >< 。

當日諗住慶祝所以食貴少少，見博多好似幾多人食，又想食拉麵喎，抱住食好野既心態入去試，服務態度都算 ok ，唔算太差，環境又幾乾淨，諗住無死一定好食啦，所以就貴少少大家各自叫左個六十幾蚊既餐，一個係雪花肥牛拉麵跟壽司，一個係吉列黑豚扒拉麵跟餃子，無野飲有小食。

等左大約兩個字，拉麵上齊，見外表好似幾 ok ，飲湯食麵，拉麵普通湯底偏喊…食壽司，同百佳有得揮既味道…食吉豬，又凍又乾又硬炸粉厚…食餃子，皮硬兼凍冰冰…原本好想投訴，但諗諗下覺得投訴都多舊魚，一陣換 d 更垃圾既野俾我點算，於是就極速食完走人，兩位盛惠百四多元。食唔飽，最後一田超市搞掂。

博多拉麵
沙田正街18號新城市廣場一期1樓119舖
Openrice: http://www.openrice.com/restaurant/sr2.htm?shopid=18943